قصايد بن فطيس المري

سولفوا تكفون لا عاد تسكتون ..
.. قبل لا أهوجس وياتيني بلاي



السكات يزود طعوني طعون ..
.. وتنكسر لا جا على راسي عصاي



سولفوا لو ما بغيتوا اتسولفون ..
.. قبل لا اقعد في الحزن رايح .. وجاي



واضحكوا لو بالعماله تضحكون ..
.. وجاملوني لو يضايقكم حكاي



لي وليفٍ راح جعله ما يهون ..
.. هو دواي وداي .. أو داي ودواي



راح لكن طيف زوله في العيون ..
.. مرةٍ قدامي ومرة وراي



وإن سكتوا جا وهو طيفه يمون ..
.. رحت أهوجس له وأبين له ولاي



مكسب عيوني من الفرقا مزووون ..
.. تمطر لطاريه .. والبرق ؟ أصدقاي



كل ما طروه لو هم يمزحون ..
.. احرموني من غداي ومن عشاي



أدري إنه ما تناسى الود كون ..
.. تسمع إذنه في قفاي اللسن عداي



وكانهم قالوا نسيته يكذبون ..
.. وإلا أنا فيه أمتلك نظرة وراي



كان حبه لي على خبري مصون ..
.. والله ان كني بقدري .. وبغلاي



ذي بقايا الحب وأطلال الجنون ..
.. والله أعلم في ضميره وش بقاي



غير طيعوني ولا عاد تسكتون ..
.. ولا والله إن أسمعكم بكاااي





----------------------------------



،؛، شطر حفظته ،؛،



ماني بمن ياتي ولا يدري به ..
.. شطرٍ حفظته ما أعرف كتابه



شطرٍ يناسبني لمثل الليله ..
.. وآشوفني في ذا المكان أولى به



أبا أتكل بالله ونعمٍ بالله ..
.. اللي ما يوصد دون خلقه بابه



باقول واللجنه تقيم قولي ..
.. ومن كثرة الشعار ماني آبه



الحمد لله واثقٍ من روحي ..
.. وإن كنت ذيب فالرجال ذيابه



ما أقول أنا أشعر واحدٍ في العالم..
.. لكن قصيدي كفو وأنا أدرى به



الشعر جمعنا لو تفرقنا ..
.. حدودنا وظروفنا الغلابة



الله يبيض وجه راعي الفكرة ..
.. عز الله انها تنحسب لحسابه



والله يبيض وجه من يرعاها ..
.. محمد الله يحفظه لأحبابه



محمد ولد زايد عريب المجنى ..
.. ولي عهد الديرة الخلابة



الشعر تاريخ لنا من مبطي ..
.. وإعلامنا يوم السنين نهابه



الشعر بيت والوزن عمدانه ..
.. معناه طنب وقافيته حجابه



الشعر وادٍ فيه صيد واجد ..
.. وكلٍ على الوادي يهج ركابه



والأفكار صيد وكل شاعر قانص ..
.. وكلٍ يدسم شاربه مخلابه



أحد خياله حر .. وأحد وكري ..
.. وأحدٍ خياله كوبجٍ بقطابه



وأنا خيالي كل ما هديته ..
.. حول على الوادي وصاد عقابه



شاركت أمثل ديرتي وربوعي ..
.. وكل يمثل ديرته وأقرابه



والله إلى الله راد والله قاله ..
.. إني لا أسلمها الفخر وكتابه



داري قطر .. وأنا هنا أمثلها ..
.. المجد مطلوبي وأنا طلابه



عهدٍ علي إني لا أشرف داري ..
.. ترك صبي ما يعز ترابه



شوفوا دمي من حبها عنابي ..
.. وحماستي من ضوها شبابه



شاعر خليجي والعروبة بيتي ..
.. والبيت ما ياقف بدون أطنابه



وإن عودت بين القبايل فزعه ..
.. أنا أشهد إني في اللوازم لابه



لي في القبايل ربع .. وأقدرهم ..
.. ماني بمن يجهل مقام أصحابه



وإن عودت لأصلي .. فأنا أصلي مري ..
.. من صلب يام أهد القنا وخضابه



قومٍ لنا فوق المعالي بيرق ..
.. والسيف قوة سلته بنصابه



الشعر طوقني وأنا طوقته ..
.. قمت آتمشى به وأفك أبوابه



يا بنت ياللي تفرقين بعودج ..
.. ما ألومهم لو كثروا الخطابه



لامر بج دربج على خلق الله ..
.. قالوا كذا بالأصبع السبابه



زينج يزينه فعل أبيج وجدج ..
.. وإنتي بدورج للنقى كسابه



قومي تباهي بي .. وفلي راسج ..
.. عليج من ستر الشرف جلبابه



وإن ما سترتج بالفعول وباسمي ..
.. فعقبني الفنجال يا صبابه




-----------------------------------------



،؛، .. يا قو قلبك .. ،؛،



ياقو قلبك على الصّده ويا صُبرك
وياوسع صدري على صدك ويا صُبري




وياطول عمرك بذاكرتي وياكُبرك
وياشيب عيني بشيّب عاد ذا كُبري




والله لون حمل صبري فوقك..ان تبرك
والله ولو تعتذر منت بعلى خبري




ان ما جبرك الغلا ما اقدر على جبرك
ياللي على ارض الوفا ما شبرك بشبري




تزعل وترجع وتلقاني على خبرك
وانا انكسر لك واجيك ادوّر لجبري




طيفك وذكراك طيلة غيبتك سبرك
وشوقي لشوفتك طيلة غيبتك سبري




امحق وليف ومحبه والا اقول ابرك
حسبي عليك اعشقك وانت اتحفر قبري



------------------------------------------------



،؛، .. في شاعر المليون .. ،؛،



في شاعر المليون للشعر مضمار ..
.. والسابقة في الشوط تظهر بيدها



امضمرين أبكار الأفكار شعّار ..
.. وكلن يحضّربكرته في وعدها



واللي تردت لا يدور لها أعذار ..
.. معذورة ما دام قد ذا جهدها




واللي تعوص وتضرب الحاجز يسار ..
.. تشلّ ف الدنة وترجع بلدها



وأنا ذلولي بنت صوغان الأشعار ..
.. من حبها عندي تفحم وحدها


إن جاره الله من تصاريف الأقدار ..
.. جاتك وجاك الجيش كله بعدها


الله عليها من مقاريد الأنظار ..
.. وصلت تحست ما غشاها زبدها


وتلقوفها بالعلم رمز وإشعار ..
.. وصفق لها منهو بعينه شهدها


ومن روبها أول ما تنصخ تمطار ..
.. ياللي تزعفرها من الطاس زدها


شبهت بالهجن الأصيلات الأشعار ..
.. وقصيدتي تراث أهلنا مددها


أعتزبه وأقبله إجلال وإكبار ..
.. واحة شرف يا سعد منهو وردها


أغلبنا في موجب الضيف والجار ..
.. يحلب لبنها قبل يذبح ولدها


وتراثنا من دونه نبيع الأعمار ..
.. وبأفعالنا روس المعالي صعدها


واليوم ضاق الجو من كثر الأقمار ..
.. تبث حقد لي لحقده رفدها


غزا الشعر قبل أمس غازين الأفكار ..
.. قومن على الساحة دفعها حقدها


تلفقوا ثم جاؤوا من كل الأقطار ..
.. هذا يصبحها والآخر هجدها


هذا يحرف في الأسف سر وإجهار ..
.. وهذاك يذبح موهبة في مهدها


وقفوا علم للشعر في وقت الأسحار ..
.. غاروا على الساحة وعروا جسدها


وصاحت بعد ما شافت سترها طار ..
.. ووقّف ولد زايد محمد ساعدها


قال أبشري بالستر وبردة الثار ..
.. وأضفى عليها سترها ما نشدها


واستل سيف في المواجيب بتار ..
.. واطلب وردن في العلا من فقدها


على خطى زايد خطاويه ما بار ..
.. والحاجة اللي في خياله وجدها


أغنى العرب من شوف أكاديمي ستار ..
.. ومن شوف أمر من السخافات وأدهى


شفت الشعر بستان وأبوابه أزهار ..
.. وقطفت ما يسقي المشاعر شهدها


قطفتها من ديرة تنبت أحرار ..
.. من دار بو مشعل ذراي وسندها


--------------------------------------


،؛، .. يوم المزايين .. ،؛،


من لابتي مّره الى جدي افطيس ..
.. ربعي مطوّعة الصعب بالصمايل


ناموس ياللي تكسبون النواميس ..
.. ياهل العلوم الغانمه والجمايل


اهل السموت وفي الملاقا فواعيس ..
.. يقطعك ياهرجٍ بليا دلايل




انتو خيارينٍ على الخيل فريّس ..
.. اسمٍ ينومس بين كل القبايل





يامقلّطينٍ شذرة السيف والكيس ..
.. قد قالها ابن حميد ضمن المثايل




منصا الرجال اللي على ضمّر العيس ..
.. وفالحرب نطّاحة شبا كل عايل




هواجرٍ لاجات قدهي مقاويس ..
.. ركب الضيوف امن السرا والقوايل



تنصا رباع امتعّبين المحاميس ..
.. مروين حد المرهفات الصقايل



يردون غصباً والعزاوي متاريس ..
.. لاجا نهارٍ فيه عدلٍ ومايل



وامسيّسين اسياسة الفوز تسيّيس ..
.. باللبل وبالهجن السباق الاصايل



تفوز في يوم المزاين وفالريس ..
.. من كل منعوته تسمى وحايل



ولو حصل للبل من الناس تفليس ..
.. يكفيكم انك فالعرب من لاوايل



تلبس من العنّاب زين الملابيس ..
.. يوم المزاين مع ارجال الحمايل



يزها بها لون العلم تتبع افنيس ..
.. ابلٍ لها عادات كسب النفايل



ومدحي لبو زايد محمد بلا قيس ..
.. مدحٍ لو يقارن بفعله .. قلايل



الله يمهّل به ويخزي لاباليس ..
.. وايدوم ذكره فوق كل الطوايل



------------------------------------------
،؛، .. لا ضاقت الدنيا .. ،؛،




لا ضاقت الدنيا عليك وتشاويت ..
.. خلق الله اللي فالرخا كان واجد



ومن العرب والصوت والثوب مليت ..
.. وقامت عليك هموم بأقعا تراجد



فارفع يديك لخالقك لا توضيت ..
.. وادعو تراك أقرب إليا صرت ساجد




ووقت من أوقاتك للأوقات توقيت ..
.. وسجل لنفسك في المساجد تواجد



وأبشر بفزعة حامي الدين والبيت ..
.. إليا هجدك من الهواجيس هاجد



اللي يميت الحي ثم يحيي الميت ..
.. لرضاه شف كثر البشر بالمساجد



----------------------------------------




،؛،.. البارحة ..،؛،



البارحة ربي كتب لي ومريت ..
..دربٍ عليه بروق الأحباب لاحت



جيت المكان اللي جمعنا وخفيت ..
.. وقامت جروحي للجوارح وصاحت



ياليتني في لفة الدرب زليت ..
.. كان العيون من الدموع استباحت



التم غيم الدمع من يوم لفيت ..
.. وورقا القصيد لشوفة الغيم ناحت



وضحكت ماأبغي الناس تدري يبالفيت ..
.. لكنها غصبٍ على العين ساحت



حارت دموعي في عيوني وصديت ..
.. وأرمشت مابيها تبين .. وطاحت



وعقبه برق في العين براق .. واسقيت ..
.. خدي ووناتي بصدري تلاحت



وأنا أحسب إني في فراقه تشافيت ..
.. وان عبرتي من مدخل الزاد زاحت



اللي يحسب إني على البعد سجيت ..
.. والا ان عيوني للرقاد استباحت



ياليتني من قبل لا أحبه اقفيت ..
.. والا ان دروبي عن دروبه تناحت



أهون علي من البكا والتناهيت ..
.. وأشلا من سدودٍ على الناس باحت



عرفت كيف الحي يفرق عن الميت ..
.. وعرفت قيمة نعمتي يوم راحت



قولوله اني عقب بعده تدانيت ..
.. ورجلي عن دروب المعافين شاحت



البعد نار وطاعة العذل كبريت ..
.. يقصر على بعده .. ترى الكبد فاحت



------------------------------------------



،؛،.. أنا جيت كلي ..،؛،



ماهو بكيفك عقب شيٍ حصلي ..
.. من ذوّق المحتاج يصبر الى احرجْه



خليتني من حلو حاليك احلي ..
.. واصبحت مدمن حب والقلب روّجْه



بين العروق وصار مافيه " ملي " ..
.. الا وله جُرّه تمرّه وتسهَجْه



وذود الغلا في عشب قلبي تفلي ..
.. وتراب صدري للمطر منْك ما احوجْه



يمحل الى صدّيت ويموت يا اللي ..
.. صديت عنّه والله احياه واخرجْه



ولي خاطر ٍ يسألْك من لي ياخلي؟ ..
.. غيبتْك تلعب به وشوفتْك تبهجْه



ولي عين حالي دمعها لك يهلي ..
.. وانْ رحْت راحت مالح الدمع تزعجْه



غالي ولا يحتاج بسّك تغلي ..
.. غلاك اخذ قلبي وروّضْه واسرجْه



ولو قلت ياعيني بصدره تملي ..
.. شافت خفوق ٍ حبك الذرْب توّجْه



وماهو على كيفك عقب ما حصلي ..
.. من ذوّق المحتاج يصبر الى ازعجْه



(عطيتني وجهك وانا جيت كلي ..
.. محروم والمحروم ما ينعطا وجْه)



-----------------------------------------



،؛،.. في كفها خاتم ..،؛،



في كفها خاتم وفي خدها خال ..
.. وفي عينها غيم وعمارات وبيوت



الخال شفته واضحٍ من ورى الشال ..
.. والخاتم الماس مرصع بياقوت



والعمر في العشرين كني مانيب زال ..
.. والجسم كنه من جبل ثلج منحوت



جبل ولكن لا طرقه الهوى مال ..
.. وخطواتها ماهي بالأمتار بالفوت



ماهي تشوف الشمس من ظل الاظلال ..
.. ومصيافها ما بين لندن وبيروت



الشمس لو تشرق على جسمها سال ..
.. كنها مجسم محلبيه وبسكوت



ومن صغر مبسمها شقى حالها الحال ..
.. ما تاكل الا اللوز والخوخ والتوت



ماهي تشوف الناس تمشي وتختال ..
.. ومرٍ على جاكور ومرٍ على حوت



وخدامتين وهي بلا زوج وعيال ..
.. وسمعتها تدعي الدريول يياقوت



وثلاث جوالات ماهو جوال ..
.. ومن يوم خلقت كل شيٍ بريموت



لكن قلبي مالها فيه مثقال ..
.. وش قرب البشت الحساوي من الكوت



ياجعلها للي خذت قلبي نعال ..
.. اللي غلاها عندي الشرب والقوت



حوريةٍ من فوقها الليل شلال ..
.. كنها صبحٍ فوقها الليل مكتوت



قلبي لها من كثرة الشوق مشخال ..
.. وللسر عن كل المخاليق تابوت



تنحت لي من الحب في القلب تمثال ..
.. وحبي لها ينحت على الساحه بيوت



في عينها ماكل رجال رجال ..
.. وأقصى حدود الوصل في سلمها الصوت



زودٍ على القلب وعلى الحسن من آل ..
.. روسٍ لهم روسٍ على متونها بشووت



الى رضت موتوا يا أهل روس الأموال ..
.. وإلى زعلت جربت وش سكرة الموت



من دونها رجلي وراكب وخيال ..
.. والسيف والأمواج والبحر والحوت



-------------------------------------------



،؛،.. دكتور العيون ..،؛،



(يامؤمن الريفي )انا جيتك زبون..
.. جيتك على مدح اكثر الناس وعنيت



جيت وتعالى الله عمّا يشركون..
.. لولاه (يامؤمن) لطبك ما اهتديت



راضي بحكم الله علي مهما يكون..
.. عالج عيوني لو بعد طبك عميت



ودي اخاشر فالبصر من يبصرون..
.. واشوف دربي لا سرحت ولا ضويت



والى قنصت اثبت مع اللي يثبتون..
.. واشوف طيري كل ما اوميت ودعيت



ياااكثر ما يضرب خويي (الطابلون)..
.. من كثر ما اكلّته مطباات وكليت



وودي اشوف اللي علي يعرضون..
.. وبعض الليالي ودي اسري دون ليت



وااشوف ناس ٍ فالقفا ما يرحمون..
.. اما وقفت لصاحبي والا مشيت



من دون نظاره ولا هم يحزنون..
.. يااا كثر ما كسّرت كشمات وشريت



لكنٌ يا دكتور جعلك ما تهون..
.. ابغيك كلمت راس دامك ما بديت



اسمع......ولا ابغي اللي وزانك يسمعون..
.. ربي كتب يكشف لك اسراري وجيت



صورة عديل الروح عندك فالعيون..
.. واخاف تقطعها بموسك ما وعيت



ولا عليك امر..اطوها تحت الجفون..
.. وعقبه لو تقطع عيوني ما شكيت



هي راس مالي والعرب ما يدركون..
.. اني على باب الممات و ما حكيت



ياقو قلبي يوم قفن الضعون..
.. اللي على ذاك الموادع ما بكيت



ويا صبر صبري والعواذل يحسبون..
.. اني دلهت من الهوى والا سليت



اسكت عساهم من سكاتي يسكتون..
.. وانا عن اللي في ضميري ما انتهيت



وادور الفرحه مع اللي يسهرون..
.. وان ذكروني خذت فنجال وسريت



اخذت من وقتك يا دكتور العيون..
.. عالج عيوني لو بعد طبك عميت



واستر علي واللي معك لا يفطنون..
.. انت الوحيد اللي بعد ربي دريت


---------------------------------------------------










،؛، ..أقول لها .. رد على ابن الفجاءة ..،؛،






اقول لها وقد طارت شعاعا ..
.. من الشعار ويحكي لا تراعي





ترى اللي كاتبه ربي بياتي ..
.. ولو ما أسعى للحظي جاش ساعي






عليك الصبر والباقي على الله ..
.. وعلى التصويت ما للخوف داعي






تحزمت بقصيدي والقبايل ..
.. وجا شعري على الدفع الرباعي





أنا في مركب الشعر الحقيقي ..
.. وجمهور الشعر حسبة شراعي





امامي لجنه كفو باهلها ..
.. وعلى الشاشات لي جمهور واعي





وما دام ان ديرتي دار التميمي ..
.. فأنا ما ظنتي يحجب شعاعي





تربينا على حب الطليعة ..
.. وندعس للوطن روس الأفاعي





نعيش لرفعته ونعيش لأجله ..
.. ونموت لعزته موت جماعي





قطر داري ودار ابن الفجاءة ..
.. بلاد نبتها سيف ويراعي





ظهر ابن الفجاءة في زمانه ..
.. وأنا ابن فطيس تظهرني ذراعي




--------------------------------------------------------------





[،؛،.. تالي عصير ..،؛،




الضيقة اللي دايمٍ تالي عصير ..
وش حيلتي وأردها لا تجيني





لا طال ظل العود حزة عشى الطير ..
كنها على سجن الحديد تحديني



يضيق صدري كل ما جات وأسير
.. ولايخفف سوج رجلي حنيني



لا حولنا مشراف ولا اقدر اطير
.. يالله قمسة خير لا تبتليني




وعقارب الساعة توقف عن السير ..
.. ولاكن في الدوحة سواتي حزيني




والعبره اللي تاصل الحلق وتحير
.. يا قربها لو قيل لي يا عويني




أمل شوف الناس ورد ومصادير ..
.. واللي يقول اشفيك كنه يهجيني




يعني على ما قيل من باب تصوير
(لاحدٍ أبي قربه ولا أحدٍ يبيني)




أروح أدور خط مابه دواوير
.. وأدور اللي هادها تهتديني




وآخذ مع الهاجوس سجة وتفكير ..
.. وأراجع اللي فات بيني وبيني




وأحسب ذنوبي وأدور التكفير ..
.. عساي ما قصرت في والديني




وعساي ما قارنت من ينفخ الكير ..
.. واللي يحمل المسك جعله قريني




ويطري علي يوم الحشر وأطلب مجير ..
.. ما أعطى كتابي في شقيقة يميني




ويطري علي صدقان كثر الدنانير ..
.. اللي اتعاديني إلا كثر ديني




وراعي الهروج اللي سوات المناشير ..
.. أصد عنه وأدري انه يعنيني




الله حسيبه يوم عرض القواوير ..
.. والله حسبي من صواب مكيني




وإلا طرالي واحد كانه اصغير ..
.. أم أصغر بيومين ولا سنيني




دريت وش قومي وعينت تفسير ..
.. للضيقة اللي من زمن تعتليني




حبه بصدري سالفة سر في بير ..
.. وكن الفواد يقول هذا زبيني




أشفق على علمٍ يجي منه من غير ..
.. لا يسمع اللي سولفوا به ونيني




يا كثرهم غيرهم ولكن خبر خير ..
.. ما غير شوفه في الوجود يهنيني




رايي كذا يا عاشقين الغنادير ..
.. ماله على وجه البسيطه وزيني




العام أجيهم من حساب المسايير ..
.. واليوم حال عداي وينه وويني




خطاي تعليق الأمل في المدابير ..
.. الين راح وشفت حقري بعيني




صبرٍ جميل وخابر إنه مقادير ..
.. والله على تخفيف حزني عويني




ذي حالتي لين اتغبا الشمس واصير ..
.. معطى سراحي عقب مانا سجيني




واذا امتلى جوف الشجر بالعصافير ..
.. طلبت من رب العباد يهديني




يعتقني المذن عقب ضيقة عصير ..
.. اللي على سجن الفراق اتحديني




------------------------------------





،؛،.. يالله عفوك ..،؛،





يالله عفوك يوم تصفية الحساب ..
.. يوم حصاد لما زرعنا في السنين





يوم الحشر قرب ولا معنا زهاب ..
.. اليوم في الدنيا وبكرة راحلين





نجني ذنوب ونرتجي عفو وثواب ..
.. وعلى نصر ربي لنا مستعجلين





تدرون ليه آمالنا كنها سراب ..
.. تدرون ليه النصر سيف الأوليين





الأوليين أعمالهم وفق الكتاب ..
.. قاموا عليه وباعوا الدنيا بدين





وحنا غفلنا بين مالذ وطاب ..
.. والنصر سيف ما يسله غافلين





نصبح على شوف انتهاكات وخراب ..
.. ونمسي على دمع وتنهات وونين





بصدورنا شي تذوب اله الهضاب ..
.. وأفعالنا والواقع رياح .. وطحين





وعلى العيون من الفتن مثل الضباب ..
.. معد درينا من يسار ومن يمين





ما للضيف الا الدعا لو ما يجاب ..
.. ما غيره الا الشوف مكتوف اليدين





يالله زلزل تحت الأعداء التراب ..
.. والطف بنا واحقن دماء المسلمين





ندعوك يا قادر على جعل السحاب ..
.. جيش لنصرة قلة مستضعفين





أغرقهم بنوع من أنواع العقاب ..
.. غرق الغلام اللي يحسب انه فطين





لوما عصى نوح نجا به في رحاب ..
.. سفينته وأمضى معه في العمر حين





لكنه اختار الخساره والذهاب ..
.. اصنع بهم صنعك به وانت المتين





والا اخذهم يا مجري سود الحقاب ..
.. أخذ العجوز اللي بقت في الغابرين





ذوقهم اللهم أنواع العذاب ..
.. اللي عثوا في أرضك أمن المفسدين





وألطف بمن لبسوا من التقوى ثياب ..
.. عبادك المستهدفين المتقين





تكالبت عليهم أنياب الذئاب ..
.. ولا غير عونك يا معين الصابرين





من بينهم شيبه يعجزون الشباب ..
.. من وقفته من طولها في الركعتين





ومن بينهم بنت تون بلا حجاب ..
.. أحجابها لفوا به الجرح المكين





وطفل عن عيون أمه الثنتين غاب ..
.. تبكيه عين وتلتفت لأخيه عين





من هول ما يجري لهم شاب الغراب ..
.. يا وسع حلمك وانت ما فوقك مدين





أدعيك وانت ادرى بحال أهل المصاب ..
.. وأمد كفي لك يا أكرم الأكرمين





-------------------------------------------------




،؛، الحب مثل النوم ،؛،




الحب مثل النوم .. والوصل .. الاحلام..
.. والشيين من الاحلام..صد المحبيين




نوم ٍ طويل ٍ عمره اشهوور واعواام ..
.. وان قمت.. ففهمها فرااق وسهر عين




وانا رقدت وعمري اربع عشر عام ..
.. وصحيت في شهر اربعه عام الالفين




نوم ٍ ثقيل ٍ كله احلام واوهاام ..
.. ونصيبي من احلامه الجانب الشين




صحّى الفرااق اقلوب في عكسه..نيام ..
.. وغاب الفرح وانا بعكسه الى اللحين




ياحزن كبدي حزن من ضاق ثم حام ..
.. اخذت فروخه مادرى ليه ولوين؟




بعد ما شاف العش عيدان وعظام ..
.. خاالي..تفكر فووق ويساار.. ويمين




خلا عشاها فيه ومن الوطى شاام ..
.. زبن على روحه وفل الجناحين




وياوجد حالي وجد من نام ثم قام ..
.. على صياح امه وهو دون رجلين




عويق وامه تنعته والنعت سام ..
.. وهو خابر انه يقسم الصف صفين




حبا وصاح بصيحة ٍ تاصل الشام ..
.. منها تقطّع في خفوقه شرايين




على وليف ٍ قسم اظنوني اقسام ..
.. واقفى وانا ما اعرف طرد المقفين




راح وترك في صدري ووسووم واعلام ..
.. وصى علي طيفه وقفى بقلبين




ليته تعذّر كان ماهو بمّلام ..
.. بعد ماشااف الدرب بيسير دربين




اشوى عليه شوي..من عظ الابهام ..
.. واشوى علي شوي..من دمعة البين




تمشي بنا الاقدام والموت قدام ..
.. وميعادنا يمفرق اثنين بعدين




ياعين لا تبكين وعيونه تنام ..
.. عادش الى ما خاب ظني بترضين




لو الدموع اتفيد فادن الايتام ..
.. ولو الكلام يفيد عادت فلسطين




ولو النباات يطّلعه دمعة هيام؟..
.. شفتوا على وجهي ورود وبساتين




الحب سجن..وبعد الاحباب الاعدام ..
.. وقلوبنا السجّان مدري مساجين




الحب نوم ٍ عمره اشهوور واعوام ..
.. وان قمت ففهمها فرااق وسهر عين




-------------------------------------------------------------------




،؛، عقبال مية عام ،؛،




عقبال ياماخذ فؤادي مية عام ..
.. ضيعتني منك وانا ما اهتديتك





لا ..ما نسيتك كيف بانساك ما دام ..
.. ذكرى الفراق تهزني لو نسيتك





حبك قدر وانا على دين الاسلام ..
.. مكتوب في وجه الجبين ورضيتك




لك في الضمير الود والحشمه اتوام ..
.. ولي في ضميرك مثل ما انا بغيتك




ولك منزلٍ في نايف القلب وخيام ..
.. وذود الغلا ترعاه ولا شكيتك




يفطر عليك القلب وان فارقك صام ..
.. والله لونك شوك سدره كليتك




القلب طيرٍ لادعي للهوى حام ..
.. والا انت وكره من كثر ماهويتك




كن العيون من النظر عقبك ايتام ..
.. وكني ماريت الا انت من يوم ريتك




وكنك معي وانا فقدتك من اعوام ..
.. مع الخيال القاك كني لقيتك




من صعب وصلك ما تهنيتك احلام ..
.. وان جابتك فزيت شوق ومحيتك




يعني وصالك صعب واهدافي اوهام ..
.. يعني زرعتك للقدر ماجنيتك




صبرك يقولون العرب كل الايام ..
.. يوم عليك ويوم لاجاك جيتك




ويا قلب ياللي ورثك اجروح وآلام ..
.. بليتني ماهو بانا اللي بليتك




ولعتني من عادني في الهوى خام ..
.. واسرفت بي وانا خطامك عطيتك




طعتك وزبدة طاعتك هم وهيام ..
.. مالله كتب لي واستخرت وعصيتك




لوللقلوب اسواق بايع وسوام ..
.. لاابدلك وان جيتني ماشريتك




والا انت ياللي جيش عينيك مقدام ..
.. لا اقنعت منك والرجا مارجيتك




كني سجين بين..افراج ..واعدام ..
.. وكنك سجن وانا بنفسي بنيتك




تنبيك عن حالي محاصيل الالهام ..
.. وتخبرك نظراتي نهار التقيتك




عقب الوصال اللي على عين من لام ..
.. قدهو يكفيني عن الوصل صيتك




وقدني الى مريت بالشارع العام ..
.. لديت من ما في الضمير ودعيتك




ادري ان صوتي ماقطع عشرة اقدام ..
.. وادري بي اعود الى من نصيتك




ياشينها يامحنيٍ راس الابهام ..
.. ماقدر على شوفك وانا عند بيتك




الاعمار ما تضمن وانا اخاف الاحكام ..
.. ارثيك خاف اودعك ما رثيتك


----------------------------------------------------------------
،؛، قد عطيتك ،؛،



قد عطيتك وانت ماضنك لئيم ..
.. والنصيحه لليالي تذكره





لاتحرك جرحي الماضي الاليم ..
.. ولاتحسب ان طول بعدك طهره




كل جرح يهون يالجرح القديم ..
.. وكل شي قد مضا معك اذكره




جرحي وذكراك والليل البهيم ..
.. حزت فوادي بمثل المنشره




العذول غراب وانا اكبر غشيم ..
.. والجروح الماء وطاريك حجره




والزمان اكرم من الحظ الكريم ..
.. لانفتح لي باب صوبك سكره




وحبك اللي لاطرى لي رحت اهيم ..
.. قمت احسب اصغر كلامك واكبره




ليتني عاد الهوا توه فطيم ..
.. انعذلت لعاذلي بس خيره




مالقيت من الوفاء يااول نديم ..
.. كون صدق الحزن وجهه وظهره





عقب رمح الشوق في وجه الصميم ..
.. سيف هجرك في قفاه وشف ثره




وانت شكلك تحسبني في نعيم ..
.. لني اخبي صوابي واستره




لايغرك حلم رجال حليم ..
.. مهون اللي من سكوته فجره




ولاتحسب الجفن من دمعه عقيم ..
.. يستحي منك والى اقفيت انثره




ولايغرك وان بدا جسمي سليم ..
.. والله ان جسمي سوار المقبره




والله ان امر من ضحك الغريم ..
.. شوف حقي بين اياديه اشكره




والله ان احر من دمع اليتيم ..
.. دمعة الرجال من فرقا مره




----------------------------------------
،؛،.. همسات لبن فطيس ..،؛،












حكّم ضميرك بين الاثنين واختّر ..
.. لاهل العلا جرّه .. وللدون جرّه




الطيب ماحدد ابّحرٍ ولا برّ ..
.. من جا على دربه من الخلق سرّه




يوم اللقا ما انّصف ضعيفٍ ولا سرّ ..
.. اللا مع من جاد كرّه وفرّه




لو كان شفت النّاس ببشوت وغتّر ..
.. كم من محارٍ ما لقي فيه درّه




الحلقه ان زرّت ابطان الجمل زرّ ..
.. ما استرّ من لا عزوةٍ له تسرّه




الجمره ان ماتت فلا ينّفع الكرّ ..
.. مافادها الشبّاب لو زاد كرّه




كم واحدٍ يضحك وهو يضمر الشرّ ..
.. عرق الشري ما انّباك لونه بقّرّه




ما كل من يضحك بوجه الفتى برّ ..
.. من يصدق الصاحب بالافعال برّه




---------------------------------------------------






الذكا ما يلبس للفتى لبس ثوب ..
.. لا يحرّج عليه ولا لمثله مزاد






لا تدافع من اللي يحتمي له بطوب ..
.. لا صفى جو مكه وش علي من تشاد






دام فيها مثل ماقيل نفضة جيوب ..
.. خل وضح النقا والصدق شف ومراد





-------------------------------------------------------------





اذا اللي قبلنا ما علموك؟ ..
.. مثل من جا وصدّر ما روا





ونكرانك جميل اللي هدوك ..
.. مثل من جوّد الصقر وشوا





وسجّ وهج عن من هم نسوك ..
.. ترى من يتبع المقفي غوا





--------------------------------------------




البايع الشاري مع الناس مقبول ..
.. بيع وشرا عااادي.. قبول وتراضي






الى اجتمع مرهي وشاعر ومخبول؟؟
.. خلطة ادب فاشل تثير امتعاضي






تشرى الذمم واتباع بالعرض والطول ..
.. والكل ينظرهااا بعينه وراضي





المال خلاّ غير معقووول؟؟ معقوول!!
.. ما ألوم نجم الاغنيّه قام ياضي





ياللأسف.. ما كل منقول مقبوول ..
.. ثوبٍ مشجّر جنّب ثوبٍ ابياااااضي





-------------------------------------------------






في غيبتك ما ألد منا ومنا ..
.. ذكراك تملى وحشتك في غيابك






بالوقت في شوفة حلاك اتهنّا ..
.. في وقفتك في مشيتك في ثيابك





لاجل العيون الناعسات اتغنّا ..
.. الله يخلي لي غلاك وشبابك





البوح لك في شوفتك ما تسنّا ..
.. مثل الكفوف الى شغلها التشابك




نسيت نفسي بين خنه وحنّا ..
.. بين العيون وبين صافي عذابك




---------------------------------






ألا يا وجودي وجد من فاجأه ديان ..
.. برغم اعتزال الناس من كثرة اديونه






بعد ما فضى جيبه وكفه وحاله شان ..
.. تناسوه ربعه كنهّم ما يعرفونه






تناسوا مواقيفه ولا كن شيٍ كان ..
..على غير ما ترضى الكرامه يحدونه





وهو كان منقع طيب منهل وفا واحسان ..
.. فلاشك عّوان الزمان ايتحدونه





رفع كفه الخالي الي الخالق الرحمن ..
..عقب ما تصافوا كلهم ظلم من دونه





---------------------------------------------





ابعدت مثل الحرف لا فارق شفاه ..
.. ثم ضاع باحضان الفضا في العباره






ماهو بفرض اني على طول وياه ..
.. الكل منّا عز راسه شعاره






لو كان من راسه الى حد ماطاه ..
.. زينه يزيّن خطوته في مساره





------------------------------------------------




لك حق تشره لو اني جيت ما جيتك ..
.. لاشك يامسندي تاتي ولا تاتي




في غيبتك لاحصل طاريك حييّتك ..
.. واحمّل الغربي الساري تحياتي






-----------------------------------------------






قطر موطني وأنا مثل من تربوا فيه ..
.. راع البل وراع المال والغيص والفلاح





رجال الا سمعوا نداه أجمعوا لبيه ..
.. تطيح الغتر والروس .. بس العلم ما طاح





سواعد الأمير وفي المحافل فخر ووجيه ..
.. ونارد حياض الموت كنحن خرز مسباح





-----------------------------------------





الموت تالي العمر والدنيا مقيل ..
.. والآخره هي منتهانا لا محال





وديني وحب الناس والخلق النبيل ..
.. ثلاث هي دربي الى حسن المئال





الله يقدرني على رد الجميل ..
.. واللي يجملني الا جالي مجال





------------------------------------------





اندوج بأشقر صافي الظهر والذيل ..
.. مطروح قد ريشة ظهره محروقه





يطلع وطلعه لا طلع .. طلع دربيل ..
.. زود على طلعه وطبعه .. لحوقه





له هيبة في الجو قبل المحابيل ..
.. فرخ العقاب ايخاشره في حقوقه





-----------------------------------------------





لا تحسب الجفن من دمعه عقيم ..
.. يستحي منك والا اقفيت انثره





ولا يغرك وان بدا جسمي سليم ..
.. والله انه مثل سور المقبره





والله ان احر من دمع اليتيم ..
.. دمعة الرجال من فرقى مره





-----------------------------------------





غاسل كفي من مصافحة بعض اليدين ..
.. وقافل بوجيه أهلها صناديق البريد





أشهد اني للبلاوي على الدنيا مدين ..
.. كل ما راجعت نفسي طلعت المستفيد





المواقف تشخل الناس والطيب يبين ..
.. كل عام يطيح تسعه ويصفى لي وحيد





-------------------------------------------------





ودي بك .. وأبيك وأباك وأبغاك ..
.. جمعتها لرضاك واختار فيها





كانك مشكك في الوفا والغلا هاك ..
.. جوالي اقر القائمه كل ابيها





رقمك مع (الصادر) ولا (وارد) أسواك ..
.. والناس في اللي (لم يرد عليها)





------------------------------------------------



بعض العرب حبه يوردك الجنون

ولا يوصف له غلاه احكاك له


مايقنعه وصف الغلا لو وش يكون
لو كل حرفٍ بالحرير يحاك له


الموت جاك وهو تقلبه الضنون
ولا لك الا الصبر....وش وداك له؟


ان قلت ضايق..قال : هونها تهون
مايدري ان ضيقتك له وبكاك له


تقعد تحبه وانت ساكت ومغبون
يمكن بيوم يقال له ما اوفاك له


وكانك مشكك هو يمون او ما يمون
تخيّل ان عفت الصبر فرقاك له


غلاه من فوق الغلا ماهو بدون
وحكاه سمعك يجبرك بارخاك له


ودك تحطه فالعيون من العيون
وتبسط على رمضى الثرا يمناك له


وتظله من الشمس في ظل الجفون,,,,
ولا يمر اذنه سوا لباك له


وتسج من غيره لونهم يذكرون
ومنين ما سجت القدم ممشاك له


فلو ٍ يميله الترف ميل الغصون
غصن ٍ ليان ومكرمه بسقاك له


جديله الى اقفى ستر منه المتون
كنّي بريحه لالتفت لدعاك له


يزها الملابس ..اي لبس ..واي لون
وفالليل وجهه لا ظهر قداك له


كيك وعسل لكن ماهو في صحون
ودعاك من عين الحسود اغطاك له


الله لا يعطيه ناس س ينضلون
ويستر عليه من النحل لا ياكله


الوصف والتعبير في وصفه يخون
غير اطلب الله يستجيب ادعاك له


وعذال قلبك في محبته يخسون
سكينهم عن قطع حبله حاكله


اللي من لحوم الاوادم ياكلون
وحلوقهم دافع البلا متواكله


ناس ٍ عن اعراض العرب ما يعرضون
ودايم على نفس الشكل والشاكله


في سلمهم اولا بالاكل الاقربون
واطيبهم اللي صيدته شكواك له


يدعيهم الشيطان للذنب ويجون
هذا يقطع له وذاك يواكله


يا جعلهم فدوة ثر الغض الفتون
اللي على الدرب الطويل اخطاك له


طيفه الى نام البشر زارك بهون
وطيفك الى نام البشر سرّاك له


حبه دفان ومقبرة خضر الطعون
بين العظام العوج كنك تاكله


اللي كذا حبه لو تموت مغبون
ولا لك الا الصبر .. وش وداك له

ويلكم

ما شاء الله محمد بن فطيس قصائدة جدا جدا جميلة
ويستحق بصراحة جائزة شاعر المليون
اخذ الجائزة عن جدارة

تسلم اخي ع النقل

شااااااااعر ع الكيف بن فطيس
م افضل الشعراء عندي

امممممممممممممممم بن فطيس ابداااااااااااااع

يسلمووووووووو

مشكورين ع الردود منورين الصفحة

قصائد جميله بن فطيس

يسلمووووووووو

ابن فطيس والله شاعر ترفعلة القبعات متميز ومبدع وكل قصايدة موزونة ومكتوبة بكلمات جد قوية ومعبرة الله يحفظة